دنيا و ما فيها نه دير ? لا ميدر الا ميدر ليلا ميدر

قامت دلدار عجب طوبى ميدر
اول خرامان سرو قاد جانا ميدر

تا ازلدن رو نما پيمانه ده
گورديغم حسن اول گل رانا ميدر

بلمزم دنيا و ما فيها نه دير
لا ميدر الا ميدر ليلا ميدر

سرخوشم دوندوكچه دنيا باشمه
دل قيام ايتمكده بيپروا ميدر

يا نيچون دونمكته در چرخ ازل
عاشق زارڭ گيبى شيدا ميدر


شاهين اوچار

شيدا ديوانندان

سن و بن

بر يوزى گل گونجه لب دلدار ديرسن ايشته سن
سن گله بلبل گيبى كيم زار ديرسن ايشته بن

زلفى عنبر , بويى عرعر سرو قد و لاله حد
بر سمنبر گونجه لب دلدار ديرسن ايشته سن

محنت و درد وغم عشقنله اولموش هسته دل
بر بلا كش عاشق ديدار ديرسن ايشته بن

هجر ايله جان و گوگل ملكنى ياغمالر قيلور
بر قاشى يا گوزلرى مكار يرسن ايشته سن

هر زمانده دير نجاتى حاى عمرم حاصلى
زلفمن طاننه كيم بردار ديرسن ايشته بن

ياريله خوشدور جهان

غزل

دلبرا من سندن آيرى عمرو جانى نيله رم

تاج و تختى، ملك و مالى، خان مانى نيله رم؟

ايسته رم وصلى جمالين، تا قيلام درده دوا،

من سنين بيمارينام، ئوزگه دوانى نيله رم؟

اى مسلمان لار، بيلين كيم، ياريله خوشدور جهان،

چون كى ياردان آيرى دوشدوم، بو جهانى نيله رم؟

چوخ دعا لار قيلميشام من خاليقين درگاهينه،

چون مراديم حاصل اولماز، من دعانى نيله رم؟

دلبر آى دير، اى نسيمى، صابر اول قيلما فغان،

من بو گون صبر ائيله سم، دانلا، فغانى نيله رم؟

عمادالدين نسيمى

صوم و صلات و حج ايله صانما كه بيتر زاهد ايشڭ

درمان آراديم دردمه , دردم باڭا درمان ايمش
برهان آراديم اصلمه اصلم باڭا برهان ايمش

صاغ و صولى گوزلر ايدم دوست يوزونو گورسه م ده يو
بن طشراده آرار ايدم اول جان ايچنده جان ايمش

صوم و صلات و حج ايله صانما كه بيتر زاهد ايشڭ
انسان كامل اولمغه لازم اولان عرفان ايمش

نيازى مصرى

تنكرى سور گوزللرى بز سويجك خطا ميدر

رند ملامتز بزم خاطرمز گوزلده در
بزه اؤگود ويرن صانر گوگل ايله گوز ألده در

كند اؤزنه وير اؤگودڭ يورو إى زاهدم ده ين
محو ايده مزسون چون آلنمڭ يازيسى أزلده در

تنكرى سور گوزللرى بز سويجك خطا ميدر
گوستريم مى آيتڭ كم بيله سون نزلده در

صورت و نقشى گوزله ين كافر و پوتبرست اولور
عاشق صادق اولانڭ خاطرى لم يزل ده در

شيخى ! بهار گونلرى منفعتى يوخ اؤگودڭ
فكر شراب و شاهد و چنگ و نى و غزلده در

شيخى

قدر! هركس ايچون فرقلى مقدر

فلك كمينه گل; كمينه ده أول در

محمد سوگلى

جانانه جان اولان بلمز جاننڭ قيمتنى

جانان ده بلمز جاننه جان اولانڭ قيمتنى

جم سلطان

شفاعت يا رسول الله

آمنه هاتون محمد آنه سى * اول صدفدن دوغدى اول در دانه سى
چنكى عبدالله دن اولدى حامله * وقت أرشدى هفته و ايام ايله
هم محمد گلمه سى اولدى يقين * چوق علامتلر بلوردى گلمه دن
اول ربيع الأول آييڭ نيجه سى * اون إكنجى گيجه اثنين گيجه سى
اول گيجه كم دوغدى اول خير البشر* آنه سى آنده نه لر گوردى نه لر
ده دى گوردم اول حبيبڭ آنه سى * بر عجب نور كم گنش پروانه سى
برق اوروب چقدى أومدن ناگهان * گوگلره دگ نورايله طولدى جهان
گوگلر آچلدى و فتح اولدى ظلم * اوچ ملك گوردم النده اوچ علم
برى مشرق برى مغربده آنڭ * برى دامنده دكلدى كعبه نڭ
بلدم آنلردن كم اول خلقيڭ يگى * كم يقين اولدى جهانه گلمه گى
انديلر ملكلر گوگدن صاف صاف * كعبه گبى قلديلر بيتم طواف
حوريلر گلدى بولوك بولوك * بوگور يوزلرى نورندن اوم طولدى نور
هم هوا ازره دوشندى بر دوشك * آدى سندس دوشه ين آنى بر ملك
يا رسول الله
چوره يانمه گلوب اوتورديلر * مصطفى يى بربرينه موشديلر
ده ديلر اوغلڭ گبى هيچ بر اوغول * ياره دله لى جهان كلمش دگول
بو سنن اوغلڭ گبى قدرى جميل * بر آنه يه ورمه مشدر اول جليل
بو گلن علم لدن سلطانيدر * بو گلن توحيد وعرفان كانيدر
بو گلن عشقڭه دور أيلر فلك * يوزنه مشتق طورر انس و ملك
بو گيجه شادان اولور ارباب دل * بو گيجه يه جان ورور اصحاب دل

يا رسول الله
رحمة للعالمين در مصطفى * هم شفيع المذنبين درمصطفى
وصفنى بو رسمه ترتيب أتديلر * اول مبارك نورى ترغيب أتديلر
آمنه أدر چون وقت اولدى تمام * كم وجوده گله اول خير الأنام
صوسه دم غايت حرارتدن قطعى * صونديلر بر جام طوليسى شربت
شربتى صوندگده باگه حوريلر * بونو ساگه الله وردى ده ديلر
قردن آق إدى و هم صوغوق ايدى * لزتى دخى شكرده يوغ ايدى
اچدم آنى اولدى جسمم نوره غرق * إده مزدم گندمى نوردن فرق
گلدى بر آق قوش قاند ايله روان * آرقه مى صيغه دى قوتله همان
دوغدى اول ساعتده اول سلطان دين * نوره غرق اولدى سماوات و زمين

صلوا عليه و سلموا تسليما
حتى تنالوا جنة و نعيما
الصلاة و السلام عليك يا رسول الله
الصلاة و السلام عليك يا حبيب الله
الصلاة و السلام عليك يا سيد الأولين والآخرين

تركيب بندِ ضيا پا شا دن

دهريڭ نه صفا وار عجبا سيم وذرنده

انسان براقير هبسينى حين سفرنده
بر رنك وفا وارمى نظر قيل شوسپهرڭ

نه ليل و نهارنده نه شمس و قمرنده
سير ايتدى هوا اوزره دينور تخت سليمان

اول سلطنتڭ يللر اسر شيمدى يرنده
حر اولمق اگر استرسه ڭ اولما دنيانڭ

زوقنده ، صفاسنده غمنده ، كدرنده
جانان كيده رندان طاغيله مى ريزان

بويله گيجه نڭ خير اوملورمى سحرنده
خير اومما اگر صدر جهان اولسه ده بالفرض

هر كيم كه خساست اوله عرق و كهرنده
يلدز آرايوپ گوكده نيجه طرفه منجم

غفلت ايله گورمز قويويى رهگذرنده
آنلر كه لاف ايله ويريرلر دنيايه نظامات

بيڭ دورلو تسيّب بولنور حانه لرنده
آينه سى ايشدر كيشنڭ لافه باقلماز

شخصيڭ كورينور رتبهء عقلى اثرنده
بن هر نه قدر كوردم ايسه بعض مضرت

ثابت قدمم ينه بورأيك اوزرنده
انسانه صداقت ياقيشر كورسه ده اكراه

يارديمجيسيدر طوغريلريڭ حضرت الله

ضيا پا شا

نسيمى دن سوگلى يه بر نامه ء رندانه

أى بحارم أى نگارم أى شكارم ديلبرم
أى حريفم أى طريفم أى شريفم ثرورم

أى گلم أى سنبلم أى سُسنم أى عنبرم
أى بنم نحلم ييگه حبّ نبات و شكّرم

أى حبيبم أى طبيبم أى طمارم هم دمم
أى رفيقم أى شفيقم أى بگم أى صفدرم

أى گلستانم گلم سرو گلن دامم بنم
صغارم شمع شبستانم ملائك پيكرم

أى رياحن راحتم روح روانم لطف ايله
سر فرازم سركشم سعد سعادت آخترم

عشق گلدى گگلم آلدى عقلمى يغماله دى
سويله آخر أى نسيمى جان ديلدن بخترم

نسيمى

الله دوستلرينڭ فضيلتى حقنده

دو جهانده تصرف اهليدر روح ولى
ديمه كيم بو مُرده در بونده نيجه درمان اوله
روح شمشير خدادر تن غلاف اولمش آڭا
دخى اعلى كار ايدر بر تيغ كيم عريان اوله

آق شمس الدين حضرتلرنڭ قبر شريفندن اقتباس

سلطان احمد حان اوّلدن خضرت پيغمبره بر مدحيه

افتراقڭله افندم بنده طاقت قالمادى
بيگانه اولدى بو دل عشقده محبت قالمادى
شول قدر آغلاتدى بن بيچاره يى حكم قضا
گريه دن هيچ حضرت يعقوبه نوبت قالمادى

نوله تاجم گبى باشمده گوتورسه م دائم
قدم رسمنى اول حضرت شاه رسلڭ
گلِ گلزار نبوّت او قدم صاحبيدر
احمدا طورمه يوزڭ سور قدمنه اول گلڭ

سلطان احمد حان الاوّل